Azərbaycanın 4 illik iqtisadi PROQNOZU

2026-cı ilədək Azərbaycanın sosial-iqtisadi inkişaf strategiyası çərçivəsində ölkə iqtisadiyyatının hər il orta hesabla 3-4 faiz artımı gözlənilir.
 
Bunu bu gün iqtisadiyyat nazirinin müavini Sahib Məmmədov bildirib.
 
Nazir müavini qeyd edib ki, işğaldan azad olunmuş ərazilərin ölkə iqtisadiyyatına reinteqrasiyası iqtisadi artım üçün daha böyük əsas yaradır.
 
"2022-ci ilin yanvar-sentyabr aylarında ötən ilin eyni dövrü ilə müqayisədə ÜDM 5,6 faiz, qeyri-neft-qaz sektoru üzrə ÜDM isə 10,1 faiz art. Xarici ticarət dövriyyəsi ötən ilin eyni dövrü ilə müqayisədə 73,3 faiz, qeyri-neft-qaz məhsullarının ixracı 17 faiz artıb", - deyə o bildirib.
 
S.Məmmədov vurğulayıb ki, orta müddətli dövrdə tullantıların təkrar emalı prosesinin əhatə dairəsinin 20 faizə çatdırılması, o cümlədən regionlarda 10% təşkil etməsi nəzərdə tutulur.
 
"Eyni zamanda qeyd edim ki, strategiyanın icrası nəticəsində ölkə iqtisadiyyatının hər il orta hesabla 3-4 faiz, qeyri-neft qaz ÜDM-nin isə illik orta hesabla 5 faiz artımı, habelə özəl sektorun iqtisadiyyatda payının 88 faizə çatdırılması, 2021-ci illə müqayisədə 2026-cı ildə qeyri-neft/qaz ixracının həcminin 85 faiz artırılması hədəflənir", - nazir deyib.