MİDA-dan 442 mənzillə bağlı yeni AÇIQLAMA

MİDA mənzillərin satışı prosesi ilə bağlı elektron sistemin izahatını həyata keçirib. 
 
Proseslə bağlı Dövlət Təhlükəsizliyi Xidmətinin və Mənzil İnşaatı Dövlət Agentliyinin (MİDA) birgə keçirdiyi brifinqdə Agentliyin Beynəlxalq əlaqələr və strateji planlaşdırma şöbəsinin müdiri Fərman Qurbanlı məlumat verib.
 
O qeyd edib ki, “Güzəştli mənzil” sisteminin iş prinsiplərinə zidd olması nəzərə alınaraq, 30 mart 2022-ci ildə keçirilmiş mənzil seçiminin nəticələrinin ləğv edilməsi barədə qərar qəbul edilib:
 
"Agentliyin sərəncamında olan mənzillərin güzəştlə satışının ədalətli, şəffaf və bərabər şəraitdə keçirilməsini təmin etmək məqsədilə Yasamal Yaşayış Kompleksinin 2-ci mərhələsində 442 mənzilin seçimi yenidən həyata keçiriləcək. Mənzil seçimi prosesinin başlanacağı tarix elan ediləcək. Satış prosesi elan edildikdə elektron sistemdə geri sayım başlayacaq və vətəndaşlar bununla bağlı məlumatlı olacaqlar".
 
Agentlik rəsmisi xatırladıb ki, mənzil satışı haqqında tarix açıqlanandan sonra, təxminən 1 ay müddətində güzəştli mənzilin DEMO versiyası elektron kabinetə sahib olan şəxslərə verilir: "Burada məqsəd iştirak etmiş şəxslərin sistemdən istifadəni təkmilləşdirilməsi ilə bağlıdır. Satış elektron qaydada həyata keçirilir. Mənzil seçimi prosesi cəmi iki mərhələdən ibarətdir. Lakin güzəştli mənzil sisteminin bəzi istifadəçiləri tərəfindən bu sistemi daha sürətli etmək üçün müəyyən şəxslərə xüsusi proqram təminatları hazırladılıb. 30 martda keçirilən seçimlərdə bu proqram təminatlarından istifadə edilib.