Taxıl sazişinin bərpası mümkün deyil - Volodin

"Təhlükəsizlik dəhlizinin terror aktları üçün istifadə edildiyi bir vaxtda taxıl müqaviləsinin bərpası mümkün deyil". 
 
Bu barədə Rusiya Dövlət Dumasının sədri Vyaçeslav Volodin bildirib. 
 
"Rusiya şənbə günü Kiyevin Qara dəniz donanmasının gəmilərinə və Sevastopol sularında mülki gəmilərə hücumundan sonra Ukrayna limanlarından məhsulların ixracında iştirakını dayandırdığını elan edib. Təhlükəsizlik dəhlizinin terror aktları üçün istifadə edildiyi bir vaxtda taxıl müqaviləsinin bərpası mümkün deyil. Rusiya Ukrayna tərəfinə Afrika və Asiyanın ən ehtiyacı olan ölkələrinə getməli olan taxıl ixrac etmək imkanı vermişdi. Ancaq cəmi 3 -4% bu ölkələrə gedib, böyük hissəsi isə Avropa Birliyinin zəngin dövlətlərinə gedib”, - deyə Dumanın spikeri bildirib. 
 
Qeyd edək ki, iyulun 22-də İstanbulda Rusiya məhsullarının ixrac üçün tədarükünə qoyulan məhdudiyyətlərin aradan qaldırılması və Ukrayna taxılının ixracına Rusiyanın yardımı haqqında çoxtərəfli sazişlər imzalanıb. Rusiya, Türkiyə, Ukrayna və BMT nümayəndələrinin imzaladığı saziş Odessa da daxil olmaqla üç limandan Ukrayna taxılının, ərzaq və gübrələrin Qara dəniz vasitəsilə ixracını nəzərdə tutub. 
 
Ötən həftə Rusiya Müdafiə Nazirliyinin yaydığı məlumata görə, Sevastopolda “Taxıl dəhlizi”nin təhlükəsizliyini təmin edən Qara dəniz donanmasının gəmilərinə və mülki gəmilərə hücumlardan sonra Moskva taxıl müqaviləsində iştirakını dayandırır.
 
Rusiya tərəfi iddia edir ki, Ukrayna Böyük Britaniyanın dəstəyi ilə sentyabrın 29-da gəmilərə doqquz pilotsuz uçan aparat və yeddi dəniz pilotsuz uçan aparatları vasitəsilə hücum edib. Ukrayna isə deyilənlərin tamamilə yalan olduğunu açıqlayıb.