Əvəz Zeynallı məni və ailəmi şantaj edib - Rasim Məmmədovun məhkəməsi

Dövlət Təhlükəsizliyi Xidmətinin (DTX) keçirdiyi əməliyyatla həbs edilmiş “Baku Steel Company” şirkətinin sabiq rəhbəri Rasim Məmmədovun məhkəmə prosesi keçirilir.
 
Bu gün Bakı Ağır Cinayətlər Məhkəməsində hakim Leyla Məmmədovanın sədrliyi ilə keçirilən iclasda R.Məmmədov sərbəst ifadə verib.
 
İş adamı “Xural” internet televiziyasının rəhbəri Əvəz Zeynallının onu və ailə üzvlərini təhdid etdiyini, pul tələb etdiyini açıqlayıb.
 
"Əvəz jurnalist deyil, cinayətkardır. Neçə illərdir, məni və ailəmi şantaj edərək, pul tələb edir. İndi şükür Allaha, gəlib oturub qonşuluqda, ağlı başına gələr. Mən onunla bağlı rəsmi qaydada şikayət irəli sürürəm. Əvəz məndən Türkiyə xüsusi xidmət orqanlarına şikayət edib”, - R.Məmmədov deyib.
 
Dövlət ittihamçısı Rasim Məmmədovun dediklərinə münasibət bildirərək, bu məlumatlarla bağlı iltizam tətbiq edilməli olduğunu bildirib:
 
"İttiham olunan şəxs cinayət tərkibi olan məlumatlar verdi. Bunlar aktlaşdırılıb Baş Prokurorluğa göndərilməlidir".
 
Qeyd edək ki, jurnalist Eynulla Fətullayev Əvəz Zeynallının Rasim Məmmədovun ailəsini şantaj edərək 20 min manat rüşvət alması ilə bağlı səsyazısı yayıb. Bununla əlaqədar Baş Prokurorluq tərəfindən cinayət işi başlanılıb, Əvəz Zeynallı və Rasim Məmmədovun vəkili Elçin Sadıqov həbs olunub.
 
Xatırladaq ki, R.Məmmədov 2021-ci ildə DTX-nin keçirdiyi əməliyyatla həbs olunub. Onun “Baku Steel Company”nin rəhbəri işlədiyi dövrdə 50 milyon manatdan çox pulu taladığı bildirilir. Məhkəmədə elan olunan ittiham aktında isə israf edilən və mənimsənilən pulların ümumi məbləğinin 185 milyon manatdan artıq olduğu göstərilib.