Rusiya XİN-dən “Laçın dəhlizi” ilə bağlı AÇIQLAMA

“Laçın dəhlizi” ətrafında yaranmış vəziyyət Rusiya, Ermənistan və Azərbaycan liderlərinin 10 noyabr 2020-ci il tarixli üçtərəfli bəyanatının 6-cı bəndi əsasında həll edilməlidir.

Bunu Rusiya Xarici İşlər Nazirliyinin İnformasiya və Mətbuat Departamentinin direktor müavini İvan Neçayev deyib.
 
Onun sözlərinə görə, üçtərəfli bəyanatın 6-cı bəndində qeyd olunur ki, tərəflərin razılığı ilə yaxın üç ildə “Laçın dəhlizi” ilə Qarabağ və Ermənistan arasında əlaqəni təmin edən yeni nəqliyyat marşrutunun tikintisi planı müəyyən ediləcək.

“Bu marşrutu qorumaq üçün Rusiya sülhməramlı kontingentinin sonradan yenidən yerləşdirilməsi nəzərdə tutulub”, - Neçayev xatırladıb.

Onun sözlərinə görə, regiondakı vəziyyət hələ də Rusiyanın diqqət mərkəzindədir. Neçayev xatırladıb ki, avqustun 4-də Rusiya Xarici İşlər Nazirliyi Qarabağ münaqişəsi zonasında vəziyyətin gərginləşməsi ilə bağlı bəyanat yayıb və hər iki ölkəni təmkinli olmağa və atəşkəs rejiminə riayət etməyə çağırıb.

Rusiya XİN-in nümayəndəsi əlavə edib ki, Moskva bütün məsələlərin Rusiya, Azərbaycan və Ermənistan liderlərinin 10 noyabr 2020-ci il, 11 yanvar və 26 noyabr 2021-ci il tarixli bəyanatlarına uyğun olaraq həll edilməsinin zəruriliyini bir daha təsdiqləyir.