Milli Qəhrəman vəfat etdi

Goranboy Rayon İcra Hakimiyyətinin sabiq başçısı, Azərbaycanın Milli Qəhrəmanı Maşallah Abdullayev 72 yaşında vəfat edib.
 
Bu barədə məlumatı mərhumun qohumları sosial şəbəkədə ictimailəşdiriblər.

Maşallah Abdullayev 1992-1993-cü illərdə Goranboy Rayon İcra Hakimiyyətinin başçısı vəzifəsində çalışıb.

O, hələ icra başçısı işləməzdən öncə - Qarabağ müharibəsi başlayanda könüllülərdən ibarət dəstə yaradaraq döyüşlərdə iştirak edib. Ağcakənd də daxil olmaqla bir sıra kəndlərin erməni işğalçılarından azad edilməsində böyük xidmətləri olub.

Azərbaycan Prezidentinin 23 iyun 1992-ci il tarxili fərmanı ilə "Milli Qəhrəman" adına layiq görülmüşdü.

Birinci Qarabağ Müharibəsindən sonra M.Abdullayev Müharibə, Əmək və Silahlı Qüvvələr Veteranlar Şurası Goranboy Rayon Surasının sədri olub. İgidliyə görə general Məhəmməd Əsədov adına mükafata və  “Azərbaycan Xalq Cümhuriyyətinin 100 illiyi” medalına layiq görülüb.
 
Mərhum uzun müddət idi ki, onkoloji xəstəlikdən əziyyət çəkirdi.

Allah rəhmət eləsin.