Rusiya Azərbaycanın irəli sürdüyü 5 prinsipi dəstəkləyir

Rusiya Ermənistanla münasibətlərin normallaşması üçün Azərbaycanın irəli sürdüyü beş əsas prinsipi dəstəkləyir.
 
Bunu Siyasi Araşdırmalar İnstitutunun direktoru, rusiyalı politoloq Sergey Markov bildirib.
 
Onun sözlərinə görə, Azərbaycan Prezidenti İlham Əliyev Ermənistanla sülh müqaviləsinin 5 prinsip üzərində qurulmasını təklif edib.
 
Rusiyalı politoloq xatırladıb ki, bu prinsiplər bir-birinin suverenliyinin və ərazi bütövlüyünün tanınması, ərazi iddialarının olmaması, bir-birinə qarşı güc və təhdidin tətbiq edilməməsi, sərhədlərin demarkasiyası və delimitasiyası, diplomatik münasibətlər və nəqliyyat kommunikasiyalarının açılması, habelə yenilərinin tikintisidir.
 
“Onlar Azərbaycan tərəfindən daha əvvəl irəli sürülüb. Rusiya bu 5 prinsipi dəstəkləyir”, - deyə S.Markov vurğulayıb.
 
Qeyd edək ki, oktyabrın 31-də Azərbaycan Respublikasının Prezidenti İlham Əliyevin Rusiya Federasiyasının Prezidenti Vladimir Putin və Ermənistan Respublikasının baş naziri Nikol Paşinyan ilə görüşü olub. Görüş Rusiyanın Soçi şəhərində baş tutub. İki saatdan artıq davam edən danışıqlardan sonra liderlər tərəfindən birgə bəyanat qəbul edilib.