TƏCİLİ: Ermənilər “Laçın” sərhəd-buraxılış məntəqəsini atəşə tutublar - Sərhədçimiz yaralanıb + YENİLƏNİB

15 iyun 2023-cü il tarixdə saat 08:45-də Ermənistan Respublikası ərazisindən açılmış atəş nəticəsində “Laçın” dövlət sərhədindən buraxılış məntəqəsində xidmət aparan Dövlət Sərhəd Xidmətinin (DSX) hərbi qulluqçusu yaralanıb.

Bu barədə DSX-nin Mətbuat Xidməti məlumat yayıb.

Məlumata görə, cavab atəşi ilə düşmənin atəş nöqtəsi susdurulub, əməliyyat şəraiti bölmələrimizin nəzarəti altındadır.

Yaralanmış hərbi qulluqçumuza ilkin tibbi yardım göstərilib, həyatı təhlükəsi yoxdur.

Bu təxribata görə bütün məsuliyyət Ermənistanın hərbi-siyasi rəhbərliyinin üzərinə düşür.

09:38

Bu gün səhər saatlarında Ermənistan silahlı qüvvələri tərəfindən “Laçın” sərhəd-buraxılış məntəqəsi avtomat silahlardan atəşə tutulub.

Bununla bağlı “Caliber” “Telegram” kanalı məlumat yayıb.

Qeyd olunur ki, atəş sərhəd-buraxılış məntəqəsi ilə üzbəüz mövqelərdən, Azərbaycanın dövlət bayrağının hər gün qaldırılma mərasimi zamanı həyata keçirilib.

Düşmən atəşi nəticəsində Azərbaycan Dövlət Sərhəd Xidmətinin hərbçisi yaralanıb.

Onun vəziyyəti stabil qiymətləndirilir.

Hazırda vəziyyət bölmələrimizin nəzarətindədir, atışmalardan sonra erməni hərbçilər postlarını tərk ediblər.

Bu dəhşətli hadisə Ermənistan tərəfindən törədilən terrorizmin və təcavüzün növbəti açıq təzahürüdür. 

Baş vermiş silahlı hücum “Laçın” sərhəd-buraxılış məntəqəsinin fəaliyyətinə problem yaratmayıb. 

Görünən odur ki, sərhəd-buraxılış məntəqəsinin fasiləsiz fəaliyyəti düşmən tərəfini ciddi narahat edir.

Silahlı hücumla əlaqədar əlavə məlumat veriləcək.