Abituryentlər ixtisas seçimi zamanı nələrə diqqət etməlidirlər?

Abituriyentlər üçün ixtisas seçimi mərhələsi yalnız toplanmış balın uyğunlaşdırılması deyil, eyni zamanda gələcək karyera və həyat yolunun başlanğıcıdır. Xüsusilə orta və az bal toplayan abituriyentlər üçün bu proses daha həssas və diqqətli yanaşma tələb edir. Təhlillərə əsasən, Azərbaycanda hər il minlərlə gənc məhz yanlış ixtisas seçimi səbəbindən ya qəbul imkanı əldə etmir, ya da ali məktəbə daxil olduqdan sonra təhsili yarımçıq qoyur.

Təhsil ekspertlərinin fikrincə, ixtisas seçimi zamanı ilk növbədə abituriyentlər real bal səviyyəsini düzgün qiymətləndirməli və ambisiyalarını ona uyğun tənzimləməlidirlər.

"Yüksək bal toplamaq uğurun göstəricisidir, amma daha az bal toplayanlar da düşünülmüş seçimlə uğurlu gələcək qura bilərlər", - deyə ekspertlər vurğulayır.

Əsas diqqət yetirilməli məqamlar arasında abituriyentin şəxsi maraqları, meyilləri, əmək bazarının tələbləri və ixtisasın gələcək imkanları dayanır. Bu mərhələdə həmçinin ixtisaslar haqqında geniş məlumat toplamaq, universitetlərin təqdim etdiyi imkanları müqayisə etmək və peşə yönümlü məsləhət almaq tövsiyə olunur.

Səhv seçim təkcə təhsil həyatını deyil, gəncin motivasiyasını və gələcək peşə uğurunu da ciddi şəkildə təsir edə bilər. Bu səbəbdən valideynlər və müəllimlər də abituriyentlərə təkcə bal yox, eyni zamanda real maraqları və bacarıqları əsasında qərar verməyə dəstək olmalıdırlar.

Qeyd edək ki, az bal toplamaq yolun sonu deyil. Düzgün seçim və məqsədyönlü planlama ilə hər abituriyent öz uğur hekayəsini yaza bilər.