Tərlan adlı şəxsə məxsus Kərpic zavodunda əmək hüquqları pozulur

[media=https://www.youtube.com/shorts/v4I5ZAbkbsw]

Göyçay rayonu ərazisində fəaliyyət göstərən kərpic zavodunun müdiri Tərlan adlı şəxs barəsində ciddi iddialar səsləndirilir. İddialara görə, müəssisədə çalışan işçilərin əksəriyyəti ilə əmək müqaviləsi bağlanmayıb və onlar qeyri-rəsmi şəkildə işə cəlb olunurlar.

Məlumatlara əsasən, işçilər sosial sığorta ilə təmin edilmədiyindən onların gələcək pensiya hüquqları və digər sosial təminatları təhlükə altına düşür. Əmək qanunvericiliyinə görə, hər bir işçi ilə əmək müqaviləsinin bağlanması və Dövlət Sosial Müdafiə Fonduna müvafiq ödənişlərin həyata keçirilməsi işəgötürənin birbaşa vəzifəsidir.

Bundan əlavə, zavodda çalışan işçilərin xüsusi iş geyimləri və fərdi mühafizə vasitələri ilə təmin olunmadığı bildirilir. Kərpic istehsalı kimi ağır və riskli sahədə təhlükəsizlik qaydalarına əməl olunmaması işçilərin sağlamlığı və həyatı üçün ciddi risk yarada bilər.

Ortaya çıxan suallar isə çoxdur: Əmək və Əhalinin Sosial Müdafiəsi Nazirliyinin müvafiq qurumları bu vəziyyətdən xəbərdardırmı? Əmək Müfəttişliyi tərəfindən müəssisədə yoxlama aparılıbmı? İşçilərin hüquqlarının qorunması istiqamətində hansı tədbirlər görülür?

Əgər səsləndirilən iddialar öz təsdiqini taparsa, məsul şəxslər barəsində qanunvericiliyə uyğun tədbirlərin görülməsi vacibdir. İşçilərin əmək hüquqlarının qorunması, təhlükəsiz əmək şəraitinin yaradılması və sosial təminatlarının təmin edilməsi hər bir işəgötürənin əsas vəzifələrindən biridir. Göyçaydakı bu müəssisə ilə bağlı aidiyyəti qurumların araşdırma aparması və ictimaiyyətə ətraflı məlumat verməsi gözlənilir.